feat. 李雋永 & 李昀庭
作詞：李兆麟
作曲：李兆麟
這是一條啥物路 害我遮爾苦！
Tse sī tsi̍t tiâu siánn-mi̍h lōo hāi guá tsiah-nī khóo!
我的身軀軟膏膏 前途看攏無
Guá ê sin-khu nńg-kô-kô tsiân-tôo khuànn lóng bô
尿哪會遮濟泡
Jiō ná ē tsiah-tsē pho
羶哪會遮臭臊
Hiàn ná ē tsiah tshàu-tsho
痰哪會遐爾癩哥？
Thâm ná ē hiah-nī thái-ko?
莫綴我行這條路 彩色變烏烏！
Mài tuè guá kiânn tsit tiâu lōo tshái-sik piàn oo-oo!
鬥陣的朋友烏趖趖 親情閃閣 tshoh
Tàu-tīn ê pîng-iú oo-sô-sô tshin-tsiânn siám koh tshoh
字定看顛倒 喙講甲無泡
Jī tiānn-tiānn khuànn tian-tò tshuì kóng kah bô pho
規身軀軟膏落荍
Kui sin-khu nńg-kô-lo̍h-siô
少年的 聽我講
siàu-liân--ê thiann guá kóng
莫閣戇 莫閣荒唐
Mài koh gōng mài koh hong-tông
你若勼咧用 改掉免閣講
Lí nā kiu teh iōng kái tiāu bián koh kóng
莫乎父母掠狂
Mài hōo pē-bú lia̍h-kông
沐著毒 人變做
Bak-tio̍h to̍k lâng piàn-tsuè
悾悾悾 楞楞楞
Khong-khong-khong gông-gông-gông
倯倯倯 戇戇戇
Sông-sông-sông gōng-gōng-gōng
這敢是你的願望？
Tse kám-sī lí ê guān-bōng?
墨著毒 人生就
Bak tio̍h to̍k lîn-sing tio̍h
烏烏烏 趖趖趖
Oo-oo-oo sô-sô-sô
塗塗塗 苦苦苦
Thôo-thôo-thôo khóo-khóo-khóo
趕緊踏出這一步
Kuánn-kín ta̍h tshut tsit tsi̍t pōo
揣出口的路
Tshuē tshut-kháu ê lōo
啥人拐我行這條路 害我遮艱苦！
Siánn lâng kuái guá kiânn tsit tiâu lōo hāi guá tsiah kan-khóo!
怪我家己太糊塗 離絕路三四步
Kuài guá ka-kī thài hôo-tôo lī tsua̍t-lōo sann sì pōo
暝哪攏睏袂飽
Mî ná lóng khùn bē pá
胃哪會遐爾慒
Uī ná ē hiah-nī tso
血哪會遐爾濁濁？
Hueh ná ē hiah-nī lô-lô?
莫綴我行這條路 鬧熱變孤孤！
Mài tuè guá kiânn tsit tiâu lōo lāu-lia̍t piàn koo-koo!
過去的朋友走攏無 員警定來囉嗦
Kuè-khì ê pîng-iú tsáu lóng bô kíng-tshat tiānn lâi lo-so
腦無啥清楚 魂到底佇佗
Náu bô sánn tshing-tshó hûn tàu-té tī-toh
兄哥煞看做阿嫂
Hiann-ko suah khuànn tsuè a-só
少年的 聽我講
siàu-liân--ê thiann guá kóng
莫閣戇 莫閣放蕩
Mài koh gōng mài koh hòng-tōng
你若有咧用 改掉才閣講
Lí nā ū leh iōng kái tiāu tsiah koh kóng
莫乎爸母失望
Mài hōo pē-bú sit-bōng
墨著毒 人變做
Bak tio̍h to̍k lâng piàn tsuè
悾悾悾 楞楞楞
Khong-khong-khong gông-gông-gông
雄雄雄 戇戇戇
Hiông-hiông-hiông gōng-gōng-gōng
緊褪掉烏色西裝
Kín thǹg tiāu oo-sik se-tsong
墨著毒 人生就
Bak tio̍h to̍k lîn-sing tio̍h
烏烏烏 塗塗塗
Oo-oo-oo thôo-thôo-thôo
苦苦苦 No No No
Khóo-khóo-khóo
趕緊踏出這一步
Kuánn-kín ta̍h-tshut tsit tsi̍t pōo
往出口的路
Óng tshut-kháu ê lōo