作詞：林阿P
作曲：林阿P
編曲：林阿P、阿科、阿賢、銘銘、夏日浪漫
七月十五號凌晨，第一次去阿姆斯特丹。
我想快啲瞓著，
但兩點幾嗰陣，
突然有飛機餐食，
全機人都食緊，
好難一個人唔食。
於是我集中精神望窗外面，
當時經過緊個地方，
有好多一條條白色螢光嘅馬路，
中間有啲紅色點
成個地面得兩隻色，
好似好科幻咁，喺唔知邊度。
我諗起小學有次交功課，
題目係當父母唔俾自己睇電視，
作為子女應該點。
我寫「我會看窗外鄰家的電視，
雖然沒有聲音但好過沒有得看」
結果班主任叫我對全班讀一次，羞辱我。
但佢羞辱唔到我，我細個係無感覺嘅人。
嗰日七月十四號，我先轉機去德國再去冰島，
我飲晒杯好難飲嘅白酒，但都瞓唔著。
呢幾年我住厭咗土瓜灣，
有時搭小巴返去，
我特登唔叫落車，
等其他人嗌，我先落車，
睇下會行幾遠路
有次去到九龍城都未有人落，
我先忍唔住叫有落，
有時除咗買嘢食，
我可以全日唔駛講嘢。
去完旅行我會搬去深水埗，
深水埗有啲拎住籠雀，
戴住老夫子嘅帽，
好似清朝嘅人。
嗰日七月十四號，
上機前我上咗一陣網，
我已經有愛人，香港無我嘅事。