(男) 大笪地好過 disco，仲有 night club 嘅享受，妙韻歌聲解悶愁，街邊演唱一流，愉快，輕鬆，優悠，添福兼夾添壽。
(女) 嘩，唔怪得呢度叫做平民夜總會啦。
(男) 呀，失禮哂啦。
(女) 原來真係咁熱鬧個喎。
(男) 熱鬧呢。
(女) 呀! 除咗有人喺街邊演唱之外，你睇嚇，仲有啲唱片檔呀，不斷咁播放啲流行曲。
(男) 好聽呢。
(女) 真係同埋啲夜總會差唔多個喳，
(男) 梗係啦，啲夜總會雖然話有冷氣唧，但係啲空氣都好混濁架嘛。
(女) 咁呀係呀，
(男) 點似得呢度舒舒服服，風涼水冷，喂喂喂，仲有呀，呢度賣啲嘢，又經濟，又實惠，乜都有得賣㗎，正所謂又平又靚。
(男) 大笪地呀啲嘢真係平，食嘢新鮮兼夾乾淨，若買新衫有款又平，占卜星相好靈，涼嚇生風舒服，心境開朗少病。
(男) 嗱，日日收咗工，走出嚟大笪地涼嚇啲生風，睇下海景，食嚇啲宵夜，的確係享受一流架。
(女) 嘩，你睇嚇呢度，人山人海咁，
(男) 密質質呢。
(女) 係呀，A，周圍啲檔口又咁好生意噃，我諗，佢哋梗係賺到盤滿缽滿定喇，
(男) 咁又唔係噃，
(女) 哦﹖
(男) 佢哋雖然係好生意，只不過係微中取利，
(女) 點解呀﹖
(男) 若果你樣樣都賣貴哂，邊度會有人幫襯你呢﹖
(女) 又係噃，可，
(男) 你聽嚇.....
(男) 大笪地擺檔搵食難，做到懞得搵兩餐飯，落雨打風個心仲煩，又要搵錢伙記開飯，捱到啦，身水身汗，奔波好似走難。