作詞：陳政亮
作曲：陳秋山
毋是懷疑自己的決定，只是輸贏予人無光榮，
堅持的敢是別人想無的責任，今仔日我是失志的人生。
朋友啊，理想是過暝的茶心，要飲敢會傷過來苦情，
有人講無聲音，有人無所不能，
不義的社會什麼所在有公平？
毋是懷疑熱情的犧牲，只是現實予人冷冰冰，
堅持的敢是別人聽無的革命，今仔日我是放棄的人生。
朋友啊，世事是層層的風湧，要行毋知要往佗一邊，
有人心內看輕，有人假意歡迎，
虛偽的世間什麼所在有真情？
毋是懷疑交往的過程，只是生活予人心頭冷，
堅持的敢是別人看無的個性，今仔日我是無聊的人生。
朋友啊，感情是黯淡的月色，要看心內失去了清明，
有時失眠對燈，有時酒醉放形，
愛情的世界什麼所在有平靜？
朋友啊，世事是層層的風湧，要行毋知要往佗一邊，
有人心內看輕，有人假意歡迎，虛偽的世間什麼所在有真情？
有人講無聲音，有人無所不能，
不義的社會什麼所在有公平？